Alhaji Lai Mohammed, wey be the megaphone for APC don yarn
again on Wednesday o, say make Federal Government stop to dey maga us for this
country dey tell us say na panick buying dey make petrol scarce. He say make
dem come out come confess say the money wey dey miss don dey take style affect
us.
According to him the kain long line wey dey petrol stations
dis day na die and na juju combine with prayer and fasting people take dey see
fuel buy now, he say while Naija pipu dey suffer for the crime wey dem no
commit, those wey thief the money, plus including the subsidy own still dey
street dey blow guy, dey do anyhow and nobody touch dem. He come tell Federal Government to dem face say dem lie pass devil as dem dey always promise say na
so so so dem go do to make life better for us, where as dem no dey do dem, now
na Naija pipu dey suffer as dem no get petrol to take on their "I better pass my
neighbour" generator and na so heat wan finish dem. To come kuku make the mata
spoil finish dem no fit commot for house cos transport money don double.
He say finally the Federal Government don fall dem hand
finish cos na this fuel mata dem first take dey boast say na dem get power to
do am make petrol no dey commot for ground but as the mata come be now, dem no
get any levels again. So make Naija pipu dey shine dem eyes dey expect more
scarcity.
That one bad o.
No comments:
Post a Comment