You go say shuuu! How Comedian wan take dey stammer? Walahitalahi me sef I no understand O, but God get how e dey work sha. Some Pipu wey dey stammer go climb stage and dem go flow wella... I never see science person wey go explain am give me sha.. Naso e be for Sikiru Ayinde Barrister the Baba of Fuji music, him too dey stammer die. Oya make TPN sharperly checkout 4 comedians wey dey make sense all over but dem dey take Ibadan do dem kabba.
PROFESSOR APPLE : Akeem Apple Davids na him real name and he don tey for the mata for Ibadan here. If you don see Apple perform before you go sabi say the guy own na number 1,dat na why him grammar na hin strongest point wey he dey take deliver for stage. Apple funny naturally with him mumu behavior and he don marry born 2 pikins, he still be correct business man cos he dey sell anything sellable under law.
MC OLYMPIA : Ibiyo Richards na him real name and dis guy na all rounder entertainer, first time wey I see am na rap he dey rap like sarkodie, na wen he mumu us finish we sabi say na nonsense he dey talk, as per say na Comedian. Olympia move to Ibadan after he school for UNAD where he for hold ground like say tomorrow no dey, he still do many TV programmes for Ondo State TV those years. If you follow Olympia Baba talk one on one, you go just dey wonder how he take dey talk well for stage, talk less if make pipu laff.
PETERU - Owomoyela PETERU Tobi na confirm Ibadan Boy as per say na Ibadan here he for school for Apata, and everybody Sabi say na him popular pass for Ibadan. He confirm dat for time wey no too tey when he do him show PETERU UNLEASHED. Many pipu no fit believe say the guy na serious stammerer before, me sef no notice until I hear am talk am for one interview. And since den I come dey see am well, but if he climb stage you no go notice am at all. Thank God for am, dem bin wan get am, I imagine wetin he for be if he still dey stammer cos he for still ni fit work for radio, Naija FM where he still be OAP now.
RAPINDADY : Jolomi Raphael na one badt funny hustler. Dis guy just talk am for Facebook say he reach 3years wey he come Ibadan and he don cover ground well like elephant sh*t. Apart from say he no well as a Comedian, him dance steps for stage especially when he dey MC no get Part 2. Rapindady too na stammerer and he no fit talk for 5 minutes, make he no enter gallop, blink eyes... But if dem give am MIC, the thing dey run. Rapindady na still OAP for Lagelu FM, Ibadan and he dey make senses.
Wetin dis tori teach us be say, you fit overcome your limitations come even turn am to your strong point. Dem no go get us O.
No comments:
Post a Comment