No be small mata yesterday as dem boko boys don show say dem
no ready to stop or slow down o, as dem attack and delete one village wey be
like 40 kilometres away from Maiduguri and take like 20 killometres far from manic,
the village wey dem first format on Sunday night.
The attack na just like 12 hours after dem kolobi one Mafa
Council Area, where dem for kill like 36 people for the village plus 2 security
people. The person wey dey there when dem enter say na around 9.45pm on Monday
the bad boys show on top plenty Toyota Hillus Jeep and okada, den just dey shoot
like say na war film, dey throw many many things wey fit blow house, and dey
scatter people house, and na so dem dey the village till like 2am dey kill people,
dey burn dem houses and dey shout “Allahu Akbar”
The bad boys no even respect our country as dem even burn
down the police station wey dey the village and dem fall 2 police men but sha o some gist still dey say our soldier
kill some of the boko boys too and say the airforce support dem with dem
aeroplane. The Oga patapata of police for Borno say na true everything happen
but dem never fit know the number of civilians wey die join the 2 police men wey
dem fall. But dem Senator, Senator Ahmed Zannah confirm on telephone say some 11
elderly people wey no fit escape and wey dem children no gree carry run wen the
gobe start fall for the matter.
Dem say na later later our soldier people wey don first find
their levels come get enough confidence to show face after den don sample the
voice of the kain weapon wey dem boko boys dey u and see say dem no too strong like that. But sha o dem say wen the boko boys dey commot dem talk say em dey
come back and na that make people dey run commot from the village to Maiduguri.
No comments:
Post a Comment